年廿八 洗邋遢
年輕家庭好多都有姐姐幫手，洗邋遢都唔關自己事，但要姐姐識洗都唔係咁易，事關佢地家鄉嘅標準、用具、清潔劑都唔同，要屋企乾乾淨淨，阿madam都係要靠下自己，以下有幾樣秘訣同大家分享：
1. 用牙膏清潔瓷器
面盤、浴缸又或者一d搪瓷容器，平日冇好好打理，好易積左層污積，試下用牙膏同布，慢慢打圈擦，好快洗淨，又唔會損害表面。
2. 用報紙抺窗
用玻璃水清潔完，抺乾窗戶，都仲係發現矇查查，用報紙打圈抺幾下，玻璃即刻「立立令」
3. 用漂白水去污
漂白水係去霉氣的好幫手，有冇發現洗衣機膠邊積水多，會有發霉發黑的情況? 唔駛驚! 用布浸滿漂白水，再鋪喺膠邊上面過夜，第二日就會發現D黑色霉氣冇哂，好神奇架! 但如果仲見到有黑點喺上面，代表霉菌已氧化，冇得救啦...
牆身一到潮濕天氣發霉，甚至有蟲蟲喺上面咁恐怖!? 得閒搵稀釋左嘅漂白水抺牆身，有助防霉防蟲架!
4. 白醋
基本上白醋可以用黎做天然安全的清潔殺菌劑，稀釋後可以用黎浸泡或清洗小朋友玩具，BB放入口咬都唔怕。
白醋混和梳打粉，又可以係好好嘅清潔劑，清潔雪櫃就唔怕食物沾到化學物質啦!
年廿八去行埋花市，人唔多，大人細路都好開心!
Search